Ökumenischen Karkdeenst up Platt
an'n 19. Juni 2022
vöarmiddaangs üm tien Üür
buten bij de ev. ref. Karke up de Hoagstee
Programm:
1. Posaunenchor
2. Wilkummenswoart (Albert Rötterink)
3. Iengangswoart (Hermann Teunis)
4. Psalm 1 50, 1 - 3, Halleluja Gott ouns Heär (Örgel)
1. Halleluja Gott ouns Heär,
is gineene ower Feär!!
Brengt Anbeteng, Pries en Ruum,
em ient grote Häiligdum!
Pucht em doar ien' Himmel bowen,
pucht, wat he uns all heff bracht,
pucht de Wunner van sien' Macht
He is Gott!! söll wij bekennen!!
2. Pucht em met Posaunenklang
enn ock met blieden Gesang.
Psalter, Harfen, pucht em völl,
met ou Saiten klingend Spöll.
Schloat de Pauken, danst gewoon,
klingen loat't denn Flöiten-Ton.
Is all groot Dien Lob en Eär,
alltied sall et noch wötten meär.
3. Ock ij Cymbeln, uwwen Schall
wodd wakker overall.
Gotts Lob, dat Lob van' Heärn.
O, ij Mäinschen, ij söllt geärn
uwwen Gott dat Lobleed brengen.
Em sall alles froo en lat,
alles, wat bloos Oam noch had,
ewig Halleluja singen.
5. Lesung: De tien Gebote (ÖKM, Lidds van de Gemeente)
1 Ick bin denn Heer, dienen Gott, denn dij ut't Ägytenlaund ut de Sklaverij ruthaalt heff. Du sass ginne anneren Götter tegen mij hebben.
2 Du sass dij ginn Bijld van dat, wat boawen ien' Himmel, wat unnern up de Ground of ien't Water unner de Ground is. Du sass se nich anbitten en eär nich denen. Men ick, denn Heer, dienen Gott, bin 'nen uppassenden Gott, denn de Undögte van de Aulen ien't Oage hault bis ien dat darde of veerte Glied an de Kinner, de mij nich möögt, men barmhattig is an Dusende, de mij leef hebbt en miene Gebote ienhault.
3 Du sass denn Namen van denn Heern, dienen Gott, nich mißbruken; denn denn Heer will denn nich ungestraaft loaten, denn sienen Namen mißbruukt.
4 Däinke an denn Söindag, dat du denn frijhaults. Sess Dage sass du warken en all dien Wark doon. Men an denn söömten Dag is denn Fierdag van Gott. An denn Dag sass du ginn Wark doon, ock nich dienen Sönn, diene Dochter, dien'n Knecht, diene Mäid, dien Vee, ock nich denn Frömden, denn bij uw leeft. Doarüm, ien sess Dage heff denn Heer Himmel en de Ground maakt en dat Meer en alls, wat doar ien is, en he röste sick ut an denn söömten Dag. Doarüm heff denn Heer denn Söindag segnet en häiligt.
5 Du sass diene Aulen eären, doarüm, dat't dij good goan mag en du noch lange maags lewen ien dat Laund, dat dij denn Heer, dienen Gott, gewen will.
6 Du sass ginne ümbrengen.
7 Du sass nich frömd goan.
8 Du sass annern nich wat wegnemmen.
9 Du sass nicks Schlechtes ower dienen Bekäinten seggen.
10 Du sass ginn Oage up dat Huus van' dienen Nöächsten schmieten, üm et sölws hebben to wollen. Du sass nich up dienen Nöachsten kieken, wat denn alles heff, noch up siene Frau, sienen Knecht, siene Mäid, sien Beest, sien Peärd of up wat anners.
6. Posaunenchor (Meditation)
7.Gebett lösse Schüld
8. Leed EG 331, Gott ouns Gott wij roopt dij to (Chor)
1. Gott ouns Gott wij roopt dij to,
höar ouns beden, höar ouns singen.
Vöar dij stoa wij, kläin en groot,
all ouns Daunkschüild dij to brengen.
Soa du was vöar lange tied,
soa bliffs du an ounse Sied.
2. Alles wat dij priesen kann,
all de Engel hoch doar bowen,
stemmt met ouns dat Daunkleed an,
dij alleen met Eär’ to loben.
All dien Volk böagt sick vöar dij,
böag ock du dij her to mij.
3. Groot bis du, Gott Zebaoth,
Woar is soa een Gott to finnen?
Stees ouns bij in all ouns Noat,
Maaks ouns frij van Schüld en Sünden.
Dij höart Daunk un Eär alleen,
loat ouns nich velöaren ween.
4. Heer, erbarm, erbarme dij,
loat dien Gnade bij ouns stoan.
Dien erbarmen bliff bij mij,
at de Mäinschen all’ willt goan:
Loat ouns nich velöaren ween,
anners stoa wij heel alleen.
9. Lesung ut de Bibel, Psalm 23 (Lidd van de Gemeente)
Denn Heer is mienen Schöaper, mij sall't an nicks felen. He wäid mij up 'ne gröne Wäide en läid mij noa frisch Water. He maakt miene Seele bliede. He läid mij up de rechte Stroate üm sienen Namens willen. En of ick all wandelte ien't düstere Tal, rekken ich nich met'n Unglück, denn du bis bij mij, diene Stange en Stock geeft mij Trost.
Du maaks vöar mij 'ne Toafel kloar ien de Oagen van miene Feinde. Du smeärs mij mienen Kopp met Öllie ien
en schäinkst mij vull ien. Godes en Barmhattigkäit söllt mij 'n Lewen laung bij mij ween, en ick sall ait bliewen ien dat Huus van ounsen Heern.
10. Bekäindnis to ounsen christlicken Glöawen (Hermann Teunis)
(soawiet at et geet, stoat't alle up)
11. Gebet
12. Leed EG Nr. 264 , De Karke, de steet faste (Posaunenchor)
1. De Karke, de steet faste,
alleen up Jesus Christ,
dee ounsen groten Gott
siene nije Schöpfung is,
van’n Himmel kwamp he daale,
en nöimp see sick as Bruut,
en kump met äigen Blood
ouns alltied weär togoot.
2. Utsöcht ut alle Völker,
en doch as een Volk täild,
een’ Heär is’t en een’ Gloawen’,
een’ Geest denn eär beseelt,
en eenen hilgenNamen,
eärt see, een heilig Moal,
en eene Hoppe deelt see,
döar siene Gnadenwaal.
3. Hier all is see vebünnen,
met em, denn is en was,
heff selige Gemeenschup,
mett de Erlösten all’,
mett dee, dee all vullkummen.
Dij Heär, dij rope wij:
Leär ouns, dat wij mett’n allen,
dij dankbar bint alltied.
13. Preeke, Markus 6, 35 - 44
14. Leed EG 406, Bij dij Jesus, will ick bliewen (Chor)
1. Bij dij Jesus, will ick bliewen,
dij too Deenst un Willen stoahn.
Nix sall mij van dij verdriewen,
will up dijn Wegg alltied goahn.
Du brengs Leewen in mijn Leewen,
Hoppen, Gloaben, Moot un Sinn.
Alltied bliew ick dij ergewen.
Mett dij bin ick, watt ick bin.
2. Watt kann ick wall better packen,
ass dijn Hand, Herr Jesus Christ?
Heff denn Himmel föarr mij loaten,
heff em hier föar mij toorüst.
Kann ick eenfacher wall wandern,
ass mett dij, du Mäinsch un Gott?
Geff't wall in de Welt nen Armen,
de soa trösten kann in Noat?
3. Woar iss soa een' Herr te finnen,
de watt Jesus doan heff, dött;
de mij fräijmaakt van mijn' Sünden,
un in Schuldnoat bij mij steht?
Sall ick dann nich too em hören,
de sijn Leewen vöör mij gaff ?
Sall ick sööken nich denn Hafen,
de mij upnemp: Leef üm Leef ?
15. Offkünnigungen (Lidd van de Gemeente))
16. Gebett met n’n still Gebett
Doarnoa Gebett all tohoape :
Ounse Vader, de du bis ien'n Himmel
(soawiet at et geet, stoat't alle up)
Ounse Vader, de du bis ien ’ n Himmel,
häiligt wött dien'n Nam'.
Dien Riek sall kummen,
alles sall geböaren, watt die'n Will'n is,
ien'n Himmel en up Erden.
Ouns daangsche Broat geef ouns vandage,
enn v'geef ouns ounse Schould,
nett as wij ock v'gewen söllt,
de ouns wat schüllig bint.
En läi' ouns futt van alle Leepichkäit,
en geef, dat wij ginn Kwoat möögt doon,
want dien is dat Riek, en de Kracht
en de Heerlikkäit, ien Ewigkäit.
Amen!
17. Leed EG 170, 1 – 3 (Örgel)
1. Kumm Heer, segne ouns, loat ouns bij dij bliewen,
en loat ouns, o Heer, nich ut ’ n anner driewen.
Wij binnt nich alleen, loat to alle Tieden,
up ouns Freud‘ en Lieden, Heer die ’ n Segen ween.
2. Kinn een kann alleen fastholl’n Gott sien’n Segen.
Meär as nöarig is, geff Gott allerwegen.
Wenn wij ounsen Feind geärn bij Tied weär good sint,
helpen, de ien Noat bint, ouns dien’n Segen schient.
3.Freeden gaffs du all, Freeden mött noch wönnen,
wu du toseggt hess: Ouns tot Wohl up Eärden.
Help, dat wij em doot, wat wij all könnt gewen.
De mett Troanen säijet, rösten söllt ien Fred’n.
18. Segen (Hermann Teunis)
( soawiet at et geet, stoat't alle up)
19. Leed EG 170, 4 (Gemeente bliff stoan)
4. Kumm Heer, segne ouns, loat ouns bij dij bliewen,
loat ouns owerall, Heer, to dij bekennen.
Nojt binnt wij alleen, loat to alle Tieden,
up ouns Freud‘ en Lieden, Heer die ’ n Segen ween.
20. To’t Äinde spöllt denn Posaunenchor
Kollekte
Dissen Deenst ien ounse Modersproake is vöarmekaar maakt döar denn Groafschupper Plattproater Kring.
Wij bedankt ouns bij alle, de to dissen Karkdeenst bijdrögen hebbt.
Ant Äijnde noch Lück Gegewens ower de Karke up de Hoagstee:
De reformeerde Karke up de Hoagstee is vöar nou 200 Joar, ien de Joaren 1821/22, van Arkel an de Vechte noa hier vesett’ wodden. Se heff ien Arkel as Kapelle nett bij denn Schultenhoff stoan. Man heff du de ut Saundsteen bestoanende Kapelle doar heelmoals ofbrökken en hier up de Hoagstee, up de „höchste Stee“, nettsoa weär upbaut. Se was as Saalkarke baut en hadde bis 1951 de Moaten van round 18 Meter Längte en 9 ½ Meter Bredd’te. De Kapelle ien Arkel stammde all ut dat 14. of 15. Joarhunnert en was dumoals van de Heeren van Gramsbergen, de du hier dat Seggen hadden, baut wodden. Tegen de Kapelle lagg to de Tied ock ’nen Karkhoff, woar ower meärere hunnert Joar de Doaden ut de dumoalige Gildschup Scheerhorn, woarto de lateren Gemeenden Scheerhorn, Berge, Bathorn, Kalle, Tinholt en ock Hoagstee höarden, begrawwt wodden wassen. Eärst an’n 5. Dezember 1819 hebbt se ien Arkel met Johannes Bernhardus Theodorus Nyhuis ut Coevern ’nen äigenen Pestoar kregen. Karklijk höarden du de Löö ut de Gildschup to de reformeerde Karke van Emmelkamp. Noa aule Regel mussen de Pestöars ut Emmelkamp alle 14 Dage söindaangs up Arkel ’nen Karkdeenst ofhollen. Dat is wall ien Loop van Joaren nich ait meär ienhollen wodden, mangs bloos noch up de hoogen Fierdage. En de Kinner mussen denn wieten Weg noa Emmelkamp en leären. Doar gaff et to Beginn van’t 19. Joarhunnert unfree ower van de Löö ut de Gildschup Scheerhorn. Met denn nou äigenen Pestoar en de nije Karke up de Hoagstee was dat heel wat anners. En nett vöar Wienachten, an’n 23. Dezember 1821, is Karke dann Gebruk nömmen wodden. Noch oawer Joartiente is de nije Karkengemeende rechtlijk van Emmelkamp ofhangig blewen en heff eärst an’n 8. Meärt 1870 eäre vulllstäinige Sölwstäinigkäit kregen. Ien 1856 is up denn Bönn’n an de Südsiete van de Karke de eärste Örgel upbaut wodden, et was de aule Örgel van Loage. 1899 heff de Karke ’n kläin Törntie met twee Klokken ut Bronze kregen. 1905 is de noch ’ne Karkenuur debij kummen, de van Frau Laarmann, geb. Buddenberg, stiftet wodden was. De Karke is 1951 heelmoals veannert wodden. Ut de aule Saalkarke is ’ne Krüsskarke met twee Sietenschippe wodden. 1985 is de Karke van Ground up utbettert en den Karkentoarn ofbaut en een Joar later weär upbaut wodden. De Karke heff ’nen nijen Iengaung en nije Klokken kregen. Binnen bint de nije Bäänke en nije Laumpen kummen. Doar heff de Karken ’n heel fräindlick Gesicht van kregen. Ien de Karke könnt nou round 360 Löö ’ne Stee finnen. Vandage heff de Gemeende soon bettie 1630 Lidds.
|
.png)
Haus Laar um 1900 in der Grafschaft Bentheim 
„Schüttruper Allerlei“ 
